کیا احتلام سے روزہ ٹوٹ جاتا ہے؟ F10-26-02

کیا احتلام سے روزہ ٹوٹ جاتا ہے؟

O احتلام کی صورت میں روزہ ٹوٹ جاتا ہے یا نہیں؟ نیز بتائیں کہ احتلام ہونے سے غسل کرنا ضروری ہے یا متاثرہ جگہ کا دھو لینا ہی کافی ہے؟

P احتلام ہونے کی صورت میں روزہ نہیں ٹوٹتا کیونکہ قرآن و سنت میں جن اشیاء سے روزہ ٹوٹنے کا ذکر ہے، احتلام ان میں نہیں ہے۔ شارع﷤ نے اسے مفسد روزہ قرار نہیں دیا ہے۔ البتہ احتلام ہونے سے صرف متاثرہ جگہ دھونا ہی نہیں بلکہ غسل کرنا چاہیے۔ جیسا کہ سیدہ عائشہ﷞ سے مروی ہے، آپ﷞ نے فرمایا کہ رسول اللہﷺ سے ایسے شخص کے متعلق دریافت کیا گیا جو تری کو تو دیکھتا ہے لیکن اسے احتلام یاد نہیں پڑتا تو آپﷺ نے فرمایا: ’’وہ غسل کرے گا۔‘‘ پھر ایک ایسے شخص کے متعلق سوال ہوا جسے اتنا تو معلوم ہے کہ اسے احتلام ہوا ہے لیکن وہ تری نہیں پاتا، رسول اللہﷺ نے فرمایا: ’’اس کے ذمے کوئی غسل نہیں ہے۔‘‘ (ابوداؤد، الطہارۃ: ۲۳۶)

اسی طرح سیدہ ام سلیم﷞ نے رسول اللہﷺ سے سوال کیا کہ جب عورت کو احتلام ہو جائے تو کیا اس پر غسل فرض ہے؟ رسول اللہﷺ نے فرمایا: ’’ہاں فرض ہے جب وہ پانی دیکھے۔‘‘ (صحیح بخاری، الغسل: ۲۸۲)

ان احادیث سے معلوم ہوا کہ احتلام کی صورت میں اگر وہ تری دیکھے تو غسل کرنا ضروری ہے، متاثرہ جگہ دھونے سے کام نہیں چلے گا۔ (واللہ اعلم)